Прырода надзіва праўдзіва...

Прырода надзіва праўдзіва —
Ці вые, ці хмельна пяе.
На свет нас яна нарадзіла,
А мы забіваем яе.

То шротам, то вострай пілою,
То труцім, то палім жыўцом...
Планету мы так прапалолі:
Патомкі заплацяць жыццём.

Альбо выпрамляем машынай
Рачулкі, што любяць пятляць.
I сохне цяністы ляшчыннік,
I мяккія сцежкі пыляць.

Прырода надзіва праўдзіва...
I толькі скрані валуны —
Калоссе зашэпча пра дзіва,
Пачнуць хвалявацца ільны.

I толькі збяры ўсё каменне
З тваёй неўрадлівай зямлі —
I сам ты замрэш у здзіўленні:
Як дзякуюць шчодра палі!

Накормяць цябе і напояць,
Бо ты нарабіўся за трох...
Пясчанае роднае поле
I крушні ля белых дарог.

Цяжкое ліпнёвае голле
Пад пылам схілілася ніц.
З трывогай сачу за Бягомлем:
Ідуць табуны навальніц.

Пімен Панчанка

Друзья

Хотите дружить? Пишите в обратную связь

Последние комментарии

Сейчас на сайте

Сейчас на сайте 0 пользователя и 2 гостя.

Каталоги

 
Rating All.BY

История поиска

-